ప్రతిభటశ్రేణిభీషణ వరగుణస్తోమభూషణ

జనిభయస్థానతారణ జగదవస్థానకారణ |

నిఖిలదుష్కర్మకర్శన నిగమసద్ధర్మదర్శన

జయ జయ శ్రీసుదర్శన జయ జయ శ్రీసుదర్శన || ౧ ||

 

శుభజగద్రూపమండన సురజనత్రాసఖండన

శతమఖబ్రహ్మవందిత శతపథబ్రహ్మనందిత |

ప్రథితవిద్వత్సపక్షిత భజదహిర్బుధ్న్యలక్షిత

జయ జయ శ్రీసుదర్శన జయ జయ శ్రీసుదర్శన || ౨ ||

 

స్ఫుటతటిజ్జాలపింజర పృథుతరజ్వాలపంజర

పరిగతప్రత్నవిగ్రహ పటుతరప్రజ్ఞదుర్గ్రహ | [పరిమిత]

ప్రహరణగ్రామమండిత పరిజనత్రాణపండిత

జయ జయ శ్రీసుదర్శన జయ జయ శ్రీసుదర్శన || ౩ ||

 

నిజపదప్రీతసద్గణ నిరుపధిస్ఫీతషడ్గుణ

నిగమనిర్వ్యూఢవైభవ నిజపరవ్యూహవైభవ |

హరిహయద్వేషిదారణ హరపురప్లోషకారణ

జయ జయ శ్రీసుదర్శన జయ జయ శ్రీసుదర్శన || ౪ ||

 

దనుజవిస్తారకర్తన జనితమిస్రావికర్తన

దనుజవిద్యానికర్తన భజదవిద్యానివర్తన |

అమరదృష్టస్వవిక్రమ సమరజుష్టభ్రమిక్రమ

జయ జయ శ్రీసుదర్శన జయ జయ శ్రీసుదర్శన || ౫ ||

 

ప్రతిముఖాలీఢబంధుర పృథుమహాహేతిదంతుర

వికటమాయాబహిష్కృత వివిధమాలాపరిష్కృత |

స్థిరమహాయంత్రతంత్రిత దృఢదయాతంత్రయంత్రిత

జయ జయ శ్రీసుదర్శన జయ జయ శ్రీసుదర్శన || ౬ ||

 

మహితసంపత్సదక్షర విహితసంపత్షడక్షర

షడరచక్రప్రతిష్ఠిత సకలతత్త్వప్రతిష్ఠిత |

వివిధసంకల్పకల్పక విబుధసంకల్పకల్పక

జయ జయ శ్రీసుదర్శన జయ జయ శ్రీసుదర్శన || ౭ ||

 

భువననేతస్త్రయీమయ సవనతేజస్త్రయీమయ

నిరవధిస్వాదుచిన్మయ నిఖిలశక్తే జగన్మయ |

అమితవిశ్వక్రియామయ శమితవిష్వగ్భయామయ

జయ జయ శ్రీసుదర్శన జయ జయ శ్రీసుదర్శన || ౮ ||

 

ద్విచతుష్కమిదం ప్రభూతసారం

పఠతాం వేంకటనాయకప్రణీతమ్ |

విషమేఽపి మనోరథః ప్రధావన్

న విహన్యేత రథాంగధుర్యగుప్తః || ౯ ||

 

ఇతి శ్రీ వేదాంతాచార్యస్య కృతిషు శ్రీ సుదర్శనాష్టకమ్ |