జయ దేవ మహాపోత్రిన్ జయ భూమిధరాచ్యుత |

హిరణ్యాక్షమహారక్షోవిదారణవిచక్షణ || ౧ ||

 

త్వమనాదిరనంతశ్చ త్వత్తః పరతరో న హి |

త్వమేవ సృష్టికాలేఽపి విధిర్భూత్వా చతుర్ముఖః || ౨ ||

 

సృజస్యేతజ్జగత్సర్వం పాసి విశ్వం సమంతతః |

కాలాగ్నిరుద్రరూపీ చ కల్పాన్తే సర్వజంతుషు || ౩ ||

 

అంతర్యామీ భవన్ దేవ సర్వకర్తా త్వమేవ హి |

నిష్కృష్టం బ్రహ్మణో రూపం న జానంతి సురాస్తవ || ౪ ||

 

ప్రసీద భగవన్ విష్ణో భూమిం స్థాపయ పూర్వవత్ |

సర్వప్రాణినివాసార్థమస్తువన్ విబుధవ్రజాః || ౫ ||

 

ఇతి శ్రీస్కందపురాణే వేంకటాచలమాహాత్మ్యే దేవకృత శ్రీ వరాహ స్తుతిః |