సుశాంతోవాచ |

జయ హరేఽమరాధీశసేవితం

తవ పదాంబుజం భూరిభూషణమ్ |

కురు మమాగ్రతః సాధుసత్కృతం

త్యజ మహామతే మోహమాత్మనః || ౧ ||

 

తవ వపుర్జగద్రూపసంపదా

విరచితం సతాం మానసే స్థితమ్ |

రతిపతేర్మనో మోహదాయకం

కురు విచేష్టితం కామలంపటమ్ || ౨ ||

 

తవ యశో జగచ్ఛోకనాశకం

మృదుకథామృతం ప్రీతిదాయకమ్ |

స్మితసుఖేక్షితం చంద్రవన్ముఖం

తవ కరోత్యలం లోకమంగళమ్ || ౩ ||

 

మమ పతిస్త్వయం సర్వదుర్జయో

యది తవాప్రియం కర్మణాచరేత్ |

జహి తదాత్మనః శత్రుముద్యతం

కురు కృపాం న చేదీదృగీశ్వరః || ౪ ||

 

మహదహంయుతం పంచమాత్రయా

ప్రకృతిజాయయా నిర్మితం వపుః |

తవ నిరీక్షణాల్లీలయా జగ-

-త్స్థితిలయోదయం బ్రహ్మకల్పితమ్ || ౫ ||

 

భూవియన్మరుద్వారితేజసాం

రాశిభిః శరీరేంద్రియాశ్రితైః |

త్రిగుణయా స్వయా మాయయా విభో

కురు కృపాం భవత్సేవనార్థినామ్ || ౬ ||

 

తవ గుణాలయం నామ పావనం

కలిమలాపహం కీర్తయంతి యే |

భవభయక్షయం తాపతాపితా

ముహురహో జనాః సంసరంతి నో || ౭ ||

 

తవ జపః సతాం మానవర్ధనం

జినకులక్షయం దేవపాలకమ్ |

కృతయుగార్పకం ధర్మపూరకం

కలికులాంతకం శం తనోతు మే || ౮ ||

 

మమ గృహం ప్రతి పుత్రనప్తృకం

గజరథైర్ధ్వజైశ్చామరైర్ధనైః |

మణివరాసనం సత్కృతిం వినా

తవ పదాబ్జయోః శోభయంతి కిమ్ || ౯ ||

 

తవ జగద్వపుః సుందరస్మితం

ముఖమనిందితం సుందరాననమ్ |

యది న మే ప్రియం వల్గుచేష్టితం

పరికరోత్యహో మృత్యురస్త్విహ || ౧౦ ||

 

హయచర భయహర కరహరశరణ

ఖరతరవరశర దశబలదమన |

జయ హతపరభవ భరవరనాశన

శశధర శతసమరసభరమదన || ౧౧ ||

 

ఇతి శ్రీకల్కిపురాణే శ్రీసుశాంతకృతం కల్కిస్తోత్రమ్ |