దుర్యోధన ఉవాచ |

గోపీభ్యః కవచం దత్తం గర్గాచార్యేణ ధీమతా |

సర్వరక్షాకరం దివ్యం దేహి మహ్యం మహామునే || ౧ ||

 

ప్రాడ్విపాక ఉవాచ |

స్నాత్వా జలే క్షౌమధరః కుశాసనః

పవిత్రపాణిః కృతమంత్రమార్జనః |

స్మృత్వాథ నత్వా బలమచ్యుతాగ్రజం

సంధారయేద్ధర్మసమాహితో భవేత్ || ౨ ||

 

గోలోకధామాధిపతిః పరేశ్వరః

పరేషు మాం పాతు పవిత్రకీర్తనః |

భూమండలం సర్షపవద్విలక్ష్యతే

యన్మూర్ధ్ని మాం పాతు స భూమిమండలే || ౩ ||

 

సేనాసు మాం రక్షతు సీరపాణిః

యుద్ధే సదా రక్షతు మాం హలీ చ |

దుర్గేషు చావ్యాన్ముసలీ సదా మాం

వనేషు సంకర్షణ ఆదిదేవః || ౪ ||

 

కలిందజావేగహరో జలేషు

నీలాంబరో రక్షతు మాం సదాగ్నౌ |

వాయౌ చ రామోఽవతు ఖే బలశ్చ

మహార్ణవేఽనంతవపుః సదా మామ్ || ౫ ||

 

శ్రీవాసుదేవోఽవతు పర్వతేషు

సహస్రశీర్షా చ మహావివాదే |

రోగేషు మాం రక్షతు రౌహిణేయో

మాం కామపాలోఽవతు వా విపత్సు || ౬ ||

 

కామాత్సదా రక్షతు ధేనుకారిః

క్రోధాత్సదా మాం ద్వివిదప్రహారీ |

లోభాత్సదా రక్షతు బల్వలారిః

మోహాత్సదా మాం కిల మాగధారిః || ౭ ||

 

ప్రాతః సదా రక్షతు వృష్ణిధుర్యః

ప్రాహ్ణే సదా మాం మథురాపురేంద్రః |

మధ్యందినే గోపసఖః ప్రపాతు

స్వరాట్ పరాహ్ణేఽవతు మాం సదైవ || ౮ ||

 

సాయం ఫణీంద్రోఽవతు మాం సదైవ

పరాత్పరో రక్షతు మాం ప్రదోషే |

పూర్ణే నిశీథే చ దురంతవీర్యః

ప్రత్యూషకాలేఽవతు మాం సదైవ || ౯ ||

 

విదిక్షు మాం రక్షతు రేవతీపతిః

దిక్షు ప్రలంబారిరధో యదూద్వహః |

ఊర్ధ్వం సదా మాం బలభద్ర ఆరా-

-త్తథా సమంతాద్బలదేవ ఏవ హి || ౧౦ ||

 

అంతః సదావ్యాత్పురుషోత్తమో బహి-

-ర్నాగేంద్రలీలోఽవతు మాం మహాబలః |

సదాంతరాత్మా చ వసన్ హరిః స్వయం

ప్రపాతు పూర్ణః పరమేశ్వరో మహాన్ || ౧౧ ||

 

దేవాసురాణాం భయనాశనం చ

హుతాశనం పాపచయేంధనానామ్ |

వినాశనం విఘ్నఘటస్య విద్ధి

సిద్ధాసనం వర్మవరం బలస్య || ౧౨ ||

 

ఇతి శ్రీగర్గసంహితాయాం బలభద్రఖండే బలరామకవచమ్ |