అదితిరువాచ –

నమస్తే దేవదేవేశ సర్వవ్యాపిఞ్జనార్దన |

సత్త్వాదిగుణభేదేన లోకవ్యాపారకారణే || ౧ ||

 

నమస్తే బహురూపాయ అరూపాయ నమో నమః |

సర్వైకాద్భుతరూపాయ నిర్గుణాయ గుణాత్మనే || ౨ ||

 

నమస్తే లోకనాథాయ పరమజ్ఞానరూపిణే |

సద్భక్తజనవాత్సల్యశీలినే మంగళాత్మనే || ౩ ||

 

యస్యావతారరూపాణి హ్యర్చయంతి మునీశ్వరాః |

తమాదిపురుషం దేవం నమామీష్టార్థసిద్ధయే || ౪ ||

 

యం న జానంతి శ్రుతయో యం న జాయంతి సూరయః |

తం నమామి జగద్ధేతుం మాయినం తమమాయినమ్ || ౫ ||

 

యస్యావలోకనం చిత్రం మాయోపద్రవవారణం |

జగద్రూపం జగత్పాలం తం వందే పద్మజాధవమ్ || ౬ ||

 

యో దేవస్త్యక్తసంగానాం శాంతానాం కరుణార్ణవః |

కరోతి హ్యాత్మనా సంగం తం వందే సంగవర్జితమ్ || ౭ ||

 

యత్పాదాబ్జజలక్లిన్నసేవారంజితమస్తకాః |

అవాపుః పరమాం సిద్ధిం తం వందే సర్వవందితమ్ || ౮ ||

 

యజ్ఞేశ్వరం యజ్ఞభుజం యజ్ఞకర్మసునిష్ఠితం |

నమామి యజ్ఞఫలదం యజ్ఞకర్మప్రభోదకమ్ || ౯ ||

 

అజామిళోఽపి పాపాత్మా యన్నామోచ్చారణాదను |

ప్రాప్తవాన్పరమం ధామ తం వందే లోకసాక్షిణమ్ || ౧౦ ||

 

బ్రహ్మాద్యా అపి యే దేవా యన్మాయాపాశయంత్రితాః |

న జానంతి పరం భావం తం వందే సర్వనాయకమ్ || ౧౧ ||

 

హృత్పద్మనిలయోఽజ్ఞానాం దూరస్థ ఇవ భాతి యః |

ప్రమాణాతీతసద్భావం తం వందే జ్ఞానసాక్షిణమ్ || ౧౨ ||

 

యన్ముఖాద్బ్రాహ్మణో జాతో బాహుభ్యః క్షత్రియోఽజని |

తథైవ ఊరుతో వైశ్యాః పద్భ్యాం శూద్రో అజాయత || ౧౩ ||

 

మనసశ్చంద్రమా జాతో జాతః సూర్యశ్చ చక్షుషః |

ముఖాదింద్రశ్చాఽగ్నిశ్చ ప్రాణాద్వాయురజాయత || ౧౪ ||

 

త్వమింద్రః పవనః సోమస్త్వమీశానస్త్వమంతకః |

త్వమగ్నిర్నిరృతిశ్చైవ వరుణస్త్వం దివాకరః || ౧౫ ||

 

దేవాశ్చ స్థావరాశ్చైవ పిశాచాశ్చైవ రాక్షసాః |

గిరయః సిద్ధగంధర్వా నద్యో భూమిశ్చ సాగరాః || ౧౬ ||

 

త్వమేవ జగతామీశో యన్నామాస్తి పరాత్పరః |

త్వద్రూపమఖిలం తస్మాత్పుత్రాన్మే పాహి శ్రీహరే || ౧౭ ||

 

ఇతి స్తుత్వా దేవధాత్రీ దేవం నత్వా పునః పునః |

ఉవాచ ప్రాంజలిర్భూత్వా హర్షాశ్రుక్షాలితస్తనీ || ౧౮ ||

 

అనుగ్రాహ్యాస్మి దేవేశ హరే సర్వాదికారణ |

అకంటకశ్రియం దేహి మత్సుతానాం దివౌకసామ్ || ౧౯ ||

 

అంతర్యామిన్ జగద్రూప సర్వభూత పరేశ్వర |

తవాజ్ఞాతం కిమస్తీహ కిం మాం మోహయసి ప్రభో || ౨౦ ||

 

తథాపి తవ వక్ష్యామి యన్మే మనసి వర్తతే |

వృథాపుత్రాస్మి దేవేశ రక్షోభిః పరిపీడితా || ౨౧ ||

 

ఏతన్న హంతుమిచ్ఛామి మత్సుతా దితిజా యతః |

తానహత్వా శ్రియం దేహి మత్సుతానామువాచ సా || ౨౨ ||

 

ఇత్యుక్తో దేవదేవస్తు పునః ప్రీతిముపాగతః |

ఉవాచ హర్షయన్సాధ్వీం కృపయాఽభి పరిప్లుతః || ౨౩ ||

 

శ్రీ భగవానువాచ |

 

ప్రీతోఽస్మి దేవి భద్రం తే భవిష్యామి సుతస్తవ |

యతః సపత్నీతనయేష్వపి వాత్సల్యశాలినీ || ౨౪ ||

 

త్వయా చ మే కృతం స్తోత్రం పఠంతి భువి మానవాః |

తేషాం పుత్రో ధనం సంపన్న హీయంతే కదాచన || ౨౫ ||

 

అంతే మత్పదమాప్నోతి యద్విష్ణోః పరమం శుభం |

 

ఇతి శ్రీపద్మపురాణే శ్రీ వామన స్తోత్రం |