దివానాథ నిశానాథౌ తౌ చ్ఛాయారోహిణిప్రియౌ |

కశ్యపాఽత్రిసముద్భూతౌ సూర్యచంద్రౌ గతిర్మమ || ౧ ||

 

గ్రహరాజౌ పుష్పవంతౌ సింహకర్కటకాధిపౌ |

అత్యుష్ణానుష్ణకిరణౌ సూర్యచంద్రౌ గతిర్మమ || ౨ ||

 

ఏకచక్రత్రిచక్రాఢ్యరథౌ లోకైకసాక్షిణౌ |

లసత్పద్మగదాహస్తౌ సూర్యచంద్రౌ గతిర్మమ || ౩ ||

 

ద్వాదశాత్మా సుధాత్మానౌ దివాకరనిశాకరౌ |

సప్తమీ దశమీ జాతౌ సూర్యచంద్రౌ గతిర్మమ || ౪ ||

 

అదిత్యాఖ్యానసూయాఖ్య దేవీగర్భసముద్భవౌ |

ఆరోగ్యాహ్లాదకర్తారౌ సూర్యచంద్రౌ గతిర్మమ || ౫ ||

 

మహాత్మానౌ చక్రవాకచకోరప్రీతికారకౌ |

సహస్రషోడశకళౌ సూర్యచంద్రౌ గతిర్మమ || ౬ ||

 

కళింగయమునాధీశౌ కమలోత్పలబాంధవౌ |

మాణిక్యముక్తాసుప్రీతౌ సూర్యచంద్రౌ గతిర్మమ || ౭ ||

 

శనితారేయజనకౌ వార్ధిశోషకతోషకౌ |

వృష్టిసస్యాకరకరౌ సూర్యచంద్రౌ గతిర్మమ || ౮ ||

 

విష్ణునేత్రాత్మకౌ రుద్రరథచక్రాత్మకావుభౌ |

రామకృష్ణాన్వయకరౌ సూర్యచంద్రౌ గతిర్మమ || ౯ ||

 

హరిసప్తాశ్వధవళౌ దశాశ్వౌ పాపహారిణౌ |

సిద్ధాంతవ్యాకృతికరౌ సూర్యచంద్రౌ గతిర్మమ || ౧౦ ||

 

సువర్తులచతుష్కోణమండలాఢ్యౌ తమోపహౌ |

గోధూమతండులప్రీతౌ సూర్యచంద్రౌ గతిర్మమ || ౧౧ ||

 

లోకేశావాతపజ్జ్యోత్స్నాశాలినౌ రాహుసూచకౌ |

మందేహదేవజేతారౌ సూర్యచంద్రౌ గతిర్మమ || ౧౨ ||

 

అరుణాఖ్యసుబంధ్వాఖ్యసారథీ వ్యోమచారిణౌ |

మహాధ్వరప్రకర్తారౌ సూర్యచంద్రౌ గతిర్మమ || ౧౩ ||

 

అర్కపాలాశసుప్రీతౌ ప్రభాకరసుధాకరౌ |

యమునానర్మదాతారౌ సూర్యచంద్రౌ గతిర్మమ || ౧౪ ||

 

పాషాణజ్వాలవిద్రావకారిణౌ కాలసూచకౌ |

విశాఖాకృత్తికాజాతౌ సూర్యచంద్రౌ గతిర్మమ || ౧౫ ||

 

ఉపేంద్రలక్ష్మీసహజౌ గ్రహనక్షత్రనాయకౌ |

క్షత్రద్విజమహారాజౌ సూర్యచంద్రౌ గతిర్మమ || ౧౬ ||

 

శ్రీచాముండాకృపాపాత్ర శ్రీకృష్ణేంద్రవినిర్మితమ్ |

విలసత్పుష్పవత్ స్తోత్ర కళాశ్లోకవిరాజితమ్ || ౧౭ ||

 

ఇదం పాపహరం స్తోత్రం సదా భక్త్యా పఠంతి యే |

తే లభంతే పుత్రపౌత్రాద్యాయురారోగ్యసంపదః || ౧౮ ||

 

ఇతి శ్రీ సూర్యచంద్రకళా స్తోత్రమ్ |