భాస్వాన్మే భాసయేత్తత్త్వం చంద్రశ్చాహ్లాదకృద్భవేత్ |

మంగలో మంగలం దద్యాద్బుధశ్చ బుధతాం దిశేత్ || ౧ ||

 

గురుర్మే గురుతాం దద్యాత్కవిశ్చ కవితాం దిశేత్ |

శనిశ్చ శం ప్రాపయతు కేతుః కేతుం జయేఽర్పయేత్ || ౨ ||

 

రాహుర్మే రహయేద్రోగం గ్రహాః సంతు కరగ్రహాః |

నవం నవం మమైశ్వర్యం దిశంత్వేతే నవగ్రహాః || ౩ ||

 

శనే దినమణేః సూనో హ్యనేకగుణసన్మణే |

అరిష్టం హర మేఽభీష్టం కురు మా కురు సంకటమ్ || ౪ ||

 

హరేరనుగ్రహార్థాయ శత్రూణాం నిగ్రహాయ చ |

వాదిరాజయతిప్రోక్తం గ్రహస్తోత్రం సదా పఠేత్ || ౫ ||

 

ఇతి శ్రీవాదిరాజయతి విరచితం నవగ్రహ స్తోత్రమ్ ||