నమస్తేఽస్తు మహాదేవ! నమస్తే పరమేశ్వర!!

నమః శివాయ దేవాయ నమస్తే బ్రహ్మరూపిణే!

నమోఽస్తుతే మహేశాయ నమశ్శాన్తాయ హేతవే!!

ప్రధాన పురుషేశాయ యోగాధిపతయే నమః!

నమః కాలాయ రుద్రాయ మహాగ్రాసాయ శూలినే!!

నమః పినాకహస్తాయ త్రినేత్రాయ నమోనమః!

నమస్త్రిమూర్తయే తుభ్యం బ్రహ్మణో జనకాయ తే!!

బ్రహ్మవిద్యాధిపతయే బ్రహ్మవిద్యాప్రదాయినే!

నమో వేదరహస్యాయ కాలకాలాయ తే నమః!!

వేదాన్తసారసారాయ నమో వేదాత్మమూర్తయే!

నమో బుద్ధాయ శుద్ధాయ యోగినాం గురవే నమః!!

ప్రహీణశోకైర్వివిధైర్భూతైః పరివృతాయ తే!

నమో బ్రహ్మణ్యదేవాయ బ్రహ్మాధిపతయే నమః!!

త్ర్యంబకాయ దేవాయ నమస్తే పరమేష్ఠినే!

నమో దిగ్వాససే తుభ్యం నమో ముణ్డాయ దణ్డినే!!

అనాదిమలహీనాయ జ్ఞానగమ్యాయ తే నమః!

నమస్తారాయ తీర్థాయ నమో యోగర్థిహేతవే!!

నమోధర్మాధిగమ్యాయ యోగగమ్యాయ తే నమః!

నమస్తే నిష్ప్రపఞ్చాయ నిరాభాసాయ తే నమః!!

బ్రహ్మణే విశ్వరూపాయ నమస్తే పరమాత్మనే!

త్వయైవ సృష్టమఖిలం త్వయ్యేవ సకలం స్థితమ్!!

త్వయా సంహ్రియతే విశ్వం ప్రధానాద్యం జగన్మయ!

త్వమీశ్వరో మహాదేవః పరంబ్రహ్మ మహేశ్వరః!!

పరమేష్ఠీ శివః శాన్తః పురుషో నిష్కలో హరః!

త్వమక్షరం పరంజ్యోతిస్త్వం కాలః పరమేశ్వరః!!

త్వమేవ పురుషోఽనన్తః ప్రధాన ప్రకృతిస్తథా!

భూమిరాపోఽనలో వాయుర్వ్యోమాహంకార ఏవ చ!!

యస్య రూపం నమస్యామి భవన్తం బ్రహ్మ సంజ్ఞితమ్!

యస్య ద్యౌరభవన్మూర్ధా పాదౌ పృథ్వీ దిశోభుజాః!!

ఆకాశముదరం తస్మై విరాజే ప్రణమామ్యహమ్!

సంతాపయతి యో విశ్వం స్వాభాభిర్భాసయన్ దిశః!!

బ్రహ్మతేజోమయం నిత్యం తస్మై సూర్యాత్మనే నమః!

హవ్యం వహతి యో నిత్యం రౌద్రీ తేజోమయీ తనుః!!

కవ్యం పితృగణానాం చ తస్మై వహ్న్యాత్మనే నమః!

ఆప్యాయయతి యో నిత్యం స్వధామ్నా సకలం జగత్!!

ప్రీయతే దేవతా సంఘైస్తస్మై సోమాత్మనే నమః!

బిభర్త్యశేషభూతాని యోఽన్తశ్చరతి సర్వదా!!

శక్తిర్మాహేశ్వరీ తుభ్యం తస్మై వాయ్వాత్మనే నమః!

సృజత్యశేషమేవేదం యః స్వకర్మానురూపతః!

స్వాత్మన్యవస్థితస్తస్మై చతుర్వక్త్రాయ తే నమః!!

యః శేష శయనే శేతే విశ్వమావృత్య మాయయా!

స్వాత్మాను భూతియోగేన తస్మై విశ్వాత్మనే నమః!

బిభర్తి శిరసా నిత్యం ద్విసప్త భువనాత్మకమ్!!

బ్రహ్మాండం యోఽఖిలాధారస్తస్మై శేషాత్మనే నమః!

యః పరాన్తే పరానన్దం పీత్వా దివ్యైక సాక్షికమ్!!

నృత్యత్యనన్తమహిమా తస్మై రుద్రాత్మనే నమః!

యోఽన్తరా సర్వభూతానాం నియన్తా తిష్ఠతీశ్వరః!!

యస్య కేశేషు జీమూతాః సద్యః సర్వాంగ సంధిషు!

కుక్షౌ సముద్రాశ్చత్వారస్తస్మై తోయాత్మనే నమః!!

యం వినిద్రా జితశ్వాసాః సంతుష్టాః సమదర్శినః!

జ్యోతిః పశ్యన్తి యుజ్ఞానాస్తస్మై యోగాత్మనే నమః!!

యయా సంతరతే మాయాం యోగీ సంక్షీణకల్మషః!

అపారతరపర్యన్తాం తస్మై విద్యాత్మనే నమః!!

యస్య భాసా విభాతీదమద్వయం తమసః పరమ్!

ప్రపద్యే తత్పరం తత్త్వం తద్రూపం పారమేశ్వరమ్!!

నిత్యానన్దం నిరాధారం నిష్కలం పరమం శివమ్!

ప్రపద్యే పరమాత్మానం భవన్తం పరమేశ్వరమ్!!