నమోఽస్తుతే శాశ్వత సర్వయోగ బ్రహ్మాదయస్త్వామృషయో వదన్తి!

తమశ్చ సత్త్వఞ్చ రజస్త్రయం చ త్వామేవ సర్వం ప్రవదన్తి సన్తః!!

త్వం బ్రహ్మా హరిరథ రుద్ర విశ్వకర్తా సంహర్తా దినకరమణ్డలాధివాసః!

ప్రాణస్త్వం హుతవహవాసవాదిభేదస్త్వామేకం శరణముపైమి దేవమీశమ్!!

సాంఖ్యాస్త్వామగుణమథాహురేకరూపం యోగస్థం సతతముపాసతే హృదిస్థమ్!

వేదాస్త్వామభిదధతీహ రుద్రమీఢ్యం త్వామేకం శరణముపైమి దేవమీశమ్!!

త్వత్పాదే కుసుమమథాపి పత్రమేకం దత్వాఽసౌ భవతి విముక్తవిశ్వబన్ధః!

సర్వాఘం ప్రణుదతి సిద్ధయోగిజుష్టం స్మృత్వా తే పదయుగళం భవత్ప్రసాదాత్!!

యస్యాశేశవిభాగహీనమమలం హృద్యన్తరావస్థితం!

తే త్వాం యోనిమనన్తమేక మచలం సత్యం పరం సర్వగమ్!!

స్థానం ప్రాహురనాదిమధ్యనిధనం యస్మాదిదం జాయతే!

నిత్యం త్వాహముపైమి సత్యవిభవం విశ్వేశ్వరం తం శివమ్!!

ఓం నీలకణ్ఠాయ త్రినేత్రాయ చ రంహసే!

మహాదేవాయ తే నిత్యమీశానాయ నమోనమః!!

నమఃపినాకినే తుభ్యం నమో ముణ్డాయ దణ్డినే!

నమస్తే వజ్రహస్తాయ దిగ్వస్త్రాయ కపర్దినే!!

నమో భైరవనాదాయ కాలరూపాయ దంష్ట్రినే!

నాగయజ్ఞోపవీతాయ నమస్తే వహ్నిరేతసే!!

నమోఽస్తు తే గిరీశాయ స్వాహాకారాయ తే నమః!

నమో ముక్తాట్టహాసాయ భీమాయ చ నమో నమః!!

నమస్తే కామనాశాయ నమః కాలప్రమాథినే!

నమో భైరవవేషాయ హరాయ చ నిషఙ్గిణే!!

నమోఽస్తు తే త్ర్యంబకాయ నమస్తే కృత్తివాససే!

నమోఽమ్బికాధిపతయే పశూనాం పతయే నమః!!

నమస్తే వ్యోమరూపాయ వ్యోమాధిపతయే నమః!

నరనారీ శరీరాయ సాంఖ్యయోగప్రవర్తినే!!

నమో భైరవనాథాయ దేవానుగతిలిఙ్గినే!

కుమార గురవే తుభ్యం దేవదేవాయ తే నమః!!

నమో యజ్ఞాధిపతయే నమస్తే బ్రహ్మచారిణే!

మృగవ్యాధాయ మహతే బ్రహ్మాధిపతయే నమః!!

నమో హంసాయ విశ్వాయ మోహనాయ నమో నమః!

యోగినే యోగగమ్యాయ యోగమాయాయ తే నమః!!

నమస్తే ప్రాణపాలాయ ఘంటానాదప్రియాయ చ!

కపాలినే నమస్తుభ్యం జ్యోతిషాం పతయే నమః!!

నమో నమోఽస్తు తే తుభ్యం భూయ ఏవ నమోనమః!