త్వామేకమీశం పురుషం పురాణం ప్రాణేశ్వరం రుద్రమనన్తయోగమ్!త్వాం పశ్యన్తి మునయో బ్రహ్మయోనిం దాన్తాః శాన్తాః విమలం రుక్మవర్ణమ్!

ధ్యాత్వాఽఽత్మస్థమచలం స్వేశవీరే కవిం పరేభ్యః పరమం తత్పరం చ!!త్వత్తః ప్రసూతా జగతఃప్రసూతిః సర్వాత్మభూస్త్వం పరమాణుభూతః!

అణోరణీయాన్ మహతో మహీయాంస్త్వామేవ సర్వం ప్రవదన్తి సన్తః!!హిరణ్యగర్భో జగదంతరాత్మా త్వత్తోఽధిజాతః పురుషః పురాణః!

సంజాయమానో భవతా విసృష్టో యథావిధానం సకలం ససర్జ!!త్వత్తో వేదాః సకలాః సంప్రసూతాస్త్వయ్యేవాన్తే సంస్థితిం తే లభన్తే!

పశ్యామస్త్వాం జగతో హేతుభూతం నృత్యన్తం స్వే హృదయే సంనివిష్టమ్!!త్వయైవేదం భ్రామ్యతే బ్రహ్మచక్రం మాయావీ త్వం జగతామేకనాథః!

నమామస్త్వాం శరణం సంప్రపన్నా యోగాత్మానం పరమాకాశమధ్యే!!నృత్యన్తం తే మహిమానం స్మరామః సర్వాత్మానం బహుధా సంనివిష్టమ్!

బ్రహ్మానన్దం చానుభూయానుభూయ!!

ఓంకారస్తే వాచకో ముక్తిబీజం త్వమక్షరం ప్రకృతౌ గూఢరూపమ్!తత్త్వాం సత్యం ప్రవదన్తీహ సన్తః స్వయంప్రభం భవతో యత్ప్రకాశమ్!!

స్తువన్తి త్వాం సతతం సర్వవేదాః నమన్తి త్వామృషయః క్షీణదోషాః!శాన్తాత్మానః సత్యసన్ధా వరిష్ఠం విశన్తి త్వాం యతయో బ్రహ్మనిష్ఠాః!!ఏకో వేదో బహుశాఖో హ్యనన్తః త్వామేవైకం బోధయతేకరూపమ్!వేద్యం త్వాం శరణం యే ప్రపన్నాస్తేషాం శాన్తిః శాశ్వతీ నేతరేషామ్!!

భవానీశోఽనాదిమాంస్తేజోరాశిర్బ్రహ్మా విశ్వం పరమేష్ఠీ వరిష్ఠః!స్వాత్మానందమనుభూయాధిశేతే స్వయంజ్యోతిరచలో నిత్యముక్తః!!

ఏకో రుద్రస్త్వం కరోషీహ విశ్వం త్వం పాలయస్యఖిలం విశ్వరూపః!త్వామేవాన్తే నిలయం విన్దతీదం సమామస్త్వాం శరణం సంప్రపన్నాః!!

త్వామేకమాహుః కవిమేకరుద్రం ప్రాణం బృహన్తం హరిమగ్నిమీశమ్!ఇంద్రం మృత్యుమనిలం చేకితానం ధాతారమాదిత్యమనేకరూపమ్!!

త్వమక్షరం పరమం వేదితవ్యం త్వమస్య విశ్వస్య పరం నిధానమ్!త్వమవ్యయః శాశ్వతధర్మగోప్తా సనాతనస్త్వం పురుషోత్తమోఽసి!!

త్వమేవ విష్ణుశ్చతురాననస్త్వం త్వమేవ రుద్రో భగవానధీశః!త్వం విశ్వనాభిః ప్రకృతిః ప్రతిష్ఠా సర్వేశ్వరస్త్వం పరమేశ్వరోఽసి!!

త్వామేకమాహుః పురుషం పురాణమాదిత్యవర్ణం తమసః పరస్తాత్!చిన్మాత్రమవ్యక్తమచింత్యరూపం ఖం బ్రహ్మశూన్యం ప్రకృతిం నిర్గుణం చ!!

యదంతరా సర్వమిదం విభాతి యదవ్యయం నిర్మలమేకరూపమ్!కిమప్యచిన్త్యం తవ రూపమేతత్ తదన్తరా యత్ప్రతిభాతి తత్త్వమ్!!

యోగీశ్వరం రుద్రమనంతశక్తిం పరాయణం బహుతనుం పవిత్రమ్!నమామ సర్వే శరణార్థినస్త్వాం ప్రసీద భూతాధిపతే! మహేశ!!

త్వత్పాదపద్మస్మరణాదశేష సంసారబీజం విలయం ప్రయాతి!మనో నియమ్య ప్రణిధాయ కాయం ప్రసాదయామో వయమేకమీశమ్!!నమో భవాయాస్తు భవోద్భవాయ కాలాయ సర్వాయ హరాయ తుభ్యమ్!నమోఽస్తు రుద్రాయ కపర్దినే తే నమోఽగ్నయే దేవ నమః శివాయ!!౪౧!!