అగస్త్య ఉవాచ |

నమోఽస్తు బృందారకబృందవంద్య-

-పాదారవిందాయ సుధాకరాయ |

షడాననాయామితవిక్రమాయ

గౌరీహృదానందసముద్భవాయ || ౧ ||

నమోఽస్తు తుభ్యం ప్రణతార్తిహంత్రే

కర్త్రే సమస్తస్య మనోరథానామ్ |

దాత్రే రథానాం పరతారకస్య

హంత్రే ప్రచండాసురతారకస్య || ౨ ||

అమూర్తమూర్తాయ సహస్రమూర్తయే

గుణాయ గణ్యాయ పరాత్పరాయ |

అపారపారాయ పరాపరాయ

నమోఽస్తు తుభ్యం శిఖివాహనాయ || ౩ ||

నమోఽస్తు తే బ్రహ్మవిదాం వరాయ

దిగంబరాయాంబరసంస్థితాయ |

హిరణ్యవర్ణాయ హిరణ్యబాహవే

నమో హిరణ్యాయ హిరణ్యరేతసే || ౪ ||

తపః స్వరూపాయ తపోధనాయ

తపః ఫలానాం ప్రతిపాదకాయ |

సదా కుమారాయ హిమారమారిణే

తృణీకృతైశ్వర్య విరాగిణే నమః || ౫ ||

నమోఽస్తు తుభ్యం శరజన్మనే విభో

ప్రభాతసూర్యారుణదంతపంక్తయే |

బాలాయ చాబాలపరాక్రమాయ షా-

-ణ్మాతురాయాలమనాతురాయ || ౬ ||

మీఢుష్టమాయోత్తరమీఢుషే నమో

నమో గణానాం పతయే గణాయ |

నమోఽస్తు తే జన్మజరాతిగాయ

నమో విశాఖాయ సుశక్తిపాణయే || ౭ ||

సర్వస్య నాథస్య కుమారకాయ

క్రౌంచారయే తారకమారకాయ |

స్వాహేయ గాంగేయ చ కార్తికేయ

శైవేయ తుభ్యం సతతం నమోఽస్తు || ౮ ||

ఇతి శ్రీస్కాందే మహాపురాణే కాశీఖండే పంచవింశతితమోఽధ్యాయే శ్రీ కార్తికేయాష్టకమ్ |