దేవర్షయ ఊచుః |

విదేహరూపం భవబంధహారం

సదా స్వనిష్ఠం స్వసుఖప్రదం తమ్ |

అమేయసాంఖ్యేన చ లభ్యమీశం

గజాననం భక్తియుతా భజామః || ౧ ||

మునీంద్రవంద్యం విధిబోధహీనం

సుబుద్ధిదం బుద్ధిధరం ప్రశాంతమ్ |

వికాలహీనం సకలాంతగం వై

గజాననం భక్తియుతా భజామః || ౨ ||

అమేయరూపం హృది సంస్థితం తం

బ్రహ్మాహమేకం భ్రమనాశకారమ్ |

అనాదిమధ్యాంతమపారరూపం

గజాననం భక్తియుతా భజామః || ౩ ||

జగత్ప్రమాణం జగదీశమేవ-

-మగమ్యమాద్యం జగదాదిహీనమ్ |

అనాత్మనాం మోహప్రదం పురాణం

గజాననం భక్తియుతా భజామః || ౪ ||

న భూర్న రూపం న జలం ప్రకాశం

న తేజసిస్థం న సమీరణస్థమ్ |

న ఖే గతం పంచవిభూతిహీనం

గజాననం భక్తియుతా భజామః || ౫ ||

న విశ్వగం తైజసగం న ప్రాజ్ఞం

సమష్టివ్యష్టిస్థమనంతగం న |

గుణైర్విహీనం పరమార్థభూతం

గజాననం భక్తియుతా భజామః || ౬ ||

గుణేశగం నైవ చ బిందుసంస్థం

న దేహినం బోధమయం న ఢుంఢిమ్ |

సంయోగహీనాః ప్రవదంతి తత్స్థం

గజాననం భక్తియుతా భజామః || ౭ ||

అనాగతం నైవ గతం గణేశం

కథం తదాకారమయం వదామః |

తథాపి సర్వం ప్రభుదేహసంస్థం

గజాననం భక్తియుతా భజామః || ౮ ||

యది త్వయా నాథ కృతం న కించి-

-త్తదా కథం సర్వమిదం విభాతి |

అతో మహాత్మానమచింత్యమేవ

గజాననం భక్తియుతా భజామః || ౯ ||

సుసిద్ధిదం భక్తజనస్య దేవం

స కామికానామిహ సౌఖ్యదం తమ్ |

అకామికానాం భవబంధహారం

గజాననం భక్తియుతా భజామః || ౧౦ ||

సురేంద్రసేవ్యం హ్యసురైః సుసేవ్యం

సమానభావేన విరాజయంతమ్ |

అనంతవాహం ముషకధ్వజం తం

గజాననం భక్తియుతా భజామః || ౧౧ ||

సదా సుఖానందమయే జలే చ

సముద్రజే చేక్షురసే నివాసమ్ |

ద్వంద్వస్య పానేన చ నాశరూపే

గజాననం భక్తియుతా భజామః || ౧౨ ||

చతుఃపదార్థా వివిధప్రకాశా-

-స్త ఏవ హస్తాః స చతుర్భుజం తమ్ |

అనాథనాథం చ మహోదరం వై

గజాననం భక్తియుతా భజామః || ౧౩ ||

మహాఖుమారూఢమకాలకాలం

విదేహయోగేన చ లభ్యమానమ్ |

అమాయినం మాయికమోహదం తం

గజాననం భక్తియుతా భజామః || ౧౪ ||

రవిస్వరూపం రవిభాసహీనం

హరిస్వరూపం హరిబోధహీనమ్ |

శివస్వరూపం శివభాసనాశం

గజాననం భక్తియుతా భజామః || ౧౫ ||

మహేశ్వరీస్థం చ సుశక్తిహీనం

ప్రభుం పరేశం పరవంద్యమేవమ్ |

అచాలకం చాలకబీజభూతం

గజాననం భక్తియుతా భజామః || ౧౬ ||

శివాదిదేవైశ్చ ఖగైః సువంద్యం

నరైర్లతావృక్షపశుప్రభూభిః |

చరాచరైర్లోకవిహీనమేవం

గజాననం భక్తియుతా భజామః || ౧౭ ||

మనోవచోహీనతయా సుసంస్థం

నివృత్తిమాత్రం హ్యజమవ్యయం తమ్ |

తథాపి దేవం పుర ఆస్థితం తం

గజాననం భక్తియుతా భజామః || ౧౮ ||

వయం సుధన్యా గణపస్తవేన

తథైవ నత్యార్చనతస్తవైవ |

గణేశరూపాశ్చ కృతాస్త్వయా తం

గజాననం భక్తియుతా భజామః || ౧౯ ||

గజాఖ్యబీజం ప్రవదంతి వేదా-

-స్తదేవ చిహ్నేన చ యోగినస్త్వామ్ |

గచ్ఛంతి తేనైవ గజాననస్త్వం

గజాననం భక్తియుతా భజామః || ౨౦ ||

పురాణవేదాః శివవిష్ణుకాద్యా-

-ఽమరాః శుకాద్యా గణపస్తవే వై |

వికుంఠితాః కిం చ వయం స్తవామ

గజాననం భక్తియుతా భజామః || ౨౧ ||

ముద్గల ఉవాచ |

ఏవం స్తుత్వా గణేశానం నేముః సర్వే పునః పునః |

తానుత్థాప్య వచో రమ్యం గజానన ఉవాచ హ || ౨౨ ||

గజానన ఉవాచ |

వరం బ్రూత మహాభాగా దేవాః సర్షిగణాః పరమ్ |

స్తోత్రేణ ప్రీతిసంయుక్తః పరం దాస్యామి వాంఛితమ్ || ౨౩ ||

గజాననవచః శ్రుత్వా హర్షయుక్తాః సురర్షయః |

జగుస్తం భక్తిభావేన సాశ్రునేత్రాః ప్రజాపతే || ౨౪ ||

దేవర్షయ ఊచుః |

గజానన యది స్వామిన్ ప్రసన్నో వరదోఽసి భోః |

తదా భక్తిం దృఢాం దేహి లోభహీనాం త్వదీయకామ్ || ౨౫ ||

లోభాసురస్య దేవేశ కృతా శాంతిః సుఖప్రదా |

తదా జగదిదం సర్వం వరయుక్తం కృతం త్వయా || ౨౬ ||

అధునా దేవదేవేశ కర్మయుక్తా ద్విజాదయః |

భవిష్యంతి ధరాయాం వై వయం స్వస్థానగాస్తథా || ౨౭ ||

స్వస్వధర్మరతాః సర్వే గజానన కృతాస్త్వయా |

అతఃపరం వరం యాచామహే ఢుంఢే కమప్యహో || ౨౮ ||

యదా తే స్మరణం నాథ కరిష్యామో వయం ప్రభో |

తదా సంకటహీనాన్ వై కురు త్వం నో గజానన || ౨౯ ||

ఏవముక్త్వా ప్రణేముస్తం గజాననమనామయమ్ |

స తానువాచ ప్రీతాత్మా భక్త్యధీనస్వభావతః || ౩౦ ||

గజానన ఉవాచ |

యద్యచ్చ ప్రార్థితం దేవా మునయః సర్వమంజసా |

భవిష్యతి న సందేహో మత్స్మృత్యా సర్వదా హి వః || ౩౧ ||

భవత్కృతమదీయం వై స్తోత్రం సర్వత్ర సిద్ధిదమ్ |

భవిష్యతి విశేషేణ మమ భక్తిప్రదాయకమ్ || ౩౨ ||

పుత్రపౌత్రప్రదం పూర్ణం ధనధాన్యవివర్ధనమ్ |

సర్వసంపత్కరం దేవాః పఠనాచ్ఛ్రవణాన్నృణామ్ || ౩౩ ||

మారణోచ్చాటనాదీని నశ్యంతి స్తోత్రపాఠతః |

పరకృత్యం చ విప్రేంద్రా అశుభం నైవ బాధతే || ౩౪ ||

సంగ్రామే జయదం చైవ యాత్రాకాలే ఫలప్రదమ్ |

శత్రూచ్చాటనకాద్యేషు ప్రశస్తం తద్భవిష్యతి || ౩౫ ||

కారాగృహగతస్యైవ బంధనాశకరం భవేత్ |

అసాధ్యం సాధయేత్ సర్వమనేనైవ సురర్షయః || ౩౬ ||

ఏకవింశతివారం చైకవింశతి దినావధిమ్ |

ప్రయోగం యః కరోత్యేవ స భవేత్ సర్వసిద్ధిభాక్ || ౩౭ ||

ధర్మార్థకామమోక్షాణాం బ్రహ్మభూతస్య దాయకమ్ |

భవిష్యతి న సందేహః స్తోత్రం మద్భక్తివర్ధనమ్ |

ఏవముక్త్వా గణాధీశస్తత్రైవాంతరధీయత || ౩౮ ||

ఇతి శ్రీమన్ముద్గలపురాణే గజాననచరితే త్రిచత్వారింశోఽధ్యాయే దేవమునికృత గజాననస్తోత్రం సంపూర్ణమ్ |