నమో గణాధిపాయ తే త్వయా జగద్వినిర్మితం

నిజేచ్ఛయా చ పాల్యతేఽధునా వశే తవ స్థితమ్ |

త్వమంతరాత్మకోఽస్యముష్య తన్మయి స్థితః పునీహి

మాం జగత్పతేఽంబికాతనూజ నిత్య శాంకరే || ౧ ||

గణేశ్వరః కృపానిధిర్జగత్పతిః పరాత్పరః

ప్రభుః స్వలీలయాఽభవచ్ఛివాన్మదావళాననః |

గిరీంద్రజాతనూభవస్తమేవ సర్వకర్మసు

ప్రపూజయంతి దేహినః సమాప్నువంతి చేప్సితమ్ || ౨ ||

చతుఃపుమర్థదాయిభిశ్చతుష్కరైర్విలంబినా

సహోదరేణ సోదరేణ పద్మజాండ సంతతేః |

పదద్వయేన చాపదాం నివారకేణ భాసురం

భజే భవాత్మజం ప్రభుం ప్రసన్నవక్త్రమద్వయమ్ || ౩ ||

బలిష్ఠమూషికాధిరాజపృష్ఠనిష్ఠవిష్ఠర-

-ప్రతిష్ఠితం గణప్రబర్హపారమేష్ఠ్యశోభితమ్ |

గరిష్ఠమాత్మభక్తకార్య విఘ్నవర్గ భంజనే

పటిష్ఠమాశ్రితావనే భజామి విఘ్ననాయకమ్ || ౪ ||

భజామి శూర్పకర్ణమగ్రజం గుహస్య శంకరా-

-త్మజం గజాననం సమస్తదేవబృందవందితమ్ |

మహాంతరాయశాంతిదం మతిప్రదం మనీషిణాం

గతిం శ్రుతిస్మృతిస్తుతం గణేశ్వరం మదీశ్వరమ్ || ౫ ||

యదంఘ్రిపల్లవస్మృతిర్నిరంతరాయ సిద్ధిదా

యమేవ బుద్ధిశాలినః స్మరంత్యహర్నిశం హృది |

యమాశ్రితస్తరత్యలంఘ్య కాలకర్మబంధనం

తమేవ చిత్సుఖాత్మకం భజామి విఘ్ననాయకమ్ || ౬ ||

కరాంబుజైః స్ఫురద్వరాభయాక్షసూత్ర పుస్తకం

సృణిం సబీజపూరకాబ్జపాశదంతమోదకాన్ |

వహన్కిరీటకుండలాది దివ్యభూషణోజ్జ్వలో

గజాననో గణాధిపః ప్రభుర్జయత్యహర్నిశమ్ || ౭ ||

గిరీంద్రజామహేశయోః పరస్పరానురాగజం

నిజానుభూతచిత్సుఖం సురైరుపాస్య దైవతమ్ |

గణేశ్వరం గురుం గుహస్య విఘ్నవర్గఘాతినం

గజాననం భజామ్యహం న దైవమన్యమాశ్రయే || ౮ ||

గణేశపంచచామరస్తుతిం పఠధ్వమాదరాత్

మనీషితార్థదాయకం మనీషిణః కలౌ యుగే |

నిరంతరాయసిద్ధిదం చిరంతనోక్తిసమ్మతం

నిరంతరం గణేశభక్తి శుద్ధచిత్తవృత్తయః || ౯ ||

ఇతి శ్రీసుబ్రహ్మణ్యయోగి విరచితా శ్రీగణేశపంచచామరస్తుతిః |