శ్రీపార్వత్యువాచ |

దేవదేవ మహాదేవ సృష్టిసంహారకారక |

మాతంగ్యాః కవచం బ్రూహి యది స్నేహోఽస్తి తే మయి || ౧ ||

 

శివ ఉవాచ |

అత్యంతగోపనం గుహ్యం కవచం సర్వకామదమ్ |

తవ ప్రీత్యా మయాఽఽఖ్యాతం నాన్యేషు కథ్యతే శుభే || ౨ ||

 

శపథం కురు మే దేవి యది కించిత్ప్రకాశసే |

అనయా సదృశీ విద్యా న భూతా న భవిష్యతి || ౩ ||

 

ధ్యానమ్ |

శవాసనాం రక్తవస్త్రాం యువతీం సర్వసిద్ధిదామ్ |

ఏవం ధ్యాత్వా మహాదేవీం పఠేత్కవచముత్తమమ్ || ౪ ||

 

కవచమ్ |

ఉచ్ఛిష్టం రక్షతు శిరః శిఖాం చండాలినీ తతః |

సుముఖీ కవచం రక్షేద్దేవీ రక్షతు చక్షుషీ || ౫ ||

 

మహాపిశాచినీ పాయాన్నాసికాం హ్రీం సదాఽవతు |

ఠః పాతు కంఠదేశం మే ఠః పాతు హృదయం తథా || ౬ ||

 

ఠో భుజౌ బాహుమూలే చ సదా రక్షతు చండికా |

ఐం చ రక్షతు పాదౌ మే సౌః కుక్షిం సర్వతః శివా || ౭ ||

 

ఐం హ్రీం కటిదేశం చ ఆం హ్రీం సంధిషు సర్వదా |

జ్యేష్ఠమాతంగ్యంగులీర్మే అంగుల్యగ్రే నమామి చ || ౮ ||

 

ఉచ్ఛిష్టచాండాలి మాం పాతు త్రైలోక్యస్య వశంకరీ |

శివే స్వాహా శరీరం మే సర్వసౌభాగ్యదాయినీ || ౯ ||

 

ఉచ్ఛిష్టచాండాలి మాతంగి సర్వవశంకరి నమః |

స్వాహా స్తనద్వయం పాతు సర్వశత్రువినాశినీ || ౧౦ ||

 

అత్యంతగోపనం దేవి దేవైరపి సుదుర్లభమ్ |

భ్రష్టేభ్యః సాధకేభ్యోఽపి ద్రష్టవ్యం న కదాచన || ౧౧ ||

 

దత్తేన సిద్ధిహానిః స్యాత్సర్వథా న ప్రకాశ్యతామ్ |

ఉచ్ఛిష్టేన బలిం దత్వా శనౌ వా మంగలే నిశి || ౧౨ ||

 

రజస్వలాభగం స్పృష్ట్వా జపేన్మంత్రం చ సాధకః |

రజస్వలాయా వస్త్రేణ హోమం కుర్యాత్సదా సుధీః || ౧౩ ||

 

సిద్ధవిద్యా ఇతో నాస్తి నియమో నాస్తి కశ్చన |

అష్టసహస్రం జపేన్మంత్రం దశాంశం హవనాదికమ్ || ౧౪ ||

 

భూర్జపత్రే లిఖిత్వా చ రక్తసూత్రేణ వేష్టయేత్ |

ప్రాణప్రతిష్ఠామంత్రేణ జీవన్యాసం సమాచరేత్ || ౧౫ ||

 

స్వర్ణమధ్యే తు సంస్థాప్య ధారయేద్దక్షిణే కరే |

సర్వసిద్ధిర్భవేత్తస్య అచిరాత్పుత్రవాన్భవేత్ || ౧౬ ||

 

స్త్రీభిర్వామకరే ధార్యం బహుపుత్రా భవేత్తదా |

వంధ్యా వా కాకవంధ్యా వా మృతవత్సా చ సాంగనా || ౧౭ ||

 

జీవద్వత్సా భవేత్సాపి సమృద్ధిర్భవతి ధ్రువమ్ |

శక్తిపూజాం సదా కుర్యాచ్ఛివాబలిం ప్రదాపయేత్ || ౧౮ ||

 

ఇదం కవచమజ్ఞాత్వా మాతంగీ యో జపేత్సదా |

తస్య సిద్ధిర్న భవతి పురశ్చరణలక్షతః || ౧౯ ||

 

ఇతి శ్రీరుద్రయామలతంత్రే మాతంగీ సుముఖీ కవచమ్ |