శ్రీదేవ్యువాచ |

పురా ప్రతిశ్రుతం దేవ క్రీడాసక్తో యదా భవాన్ |

నామ్నాం శతం మహాకాళ్యాః కథయస్వ మయి ప్రభో || ౧ ||

 

శ్రీభైరవ ఉవాచ |

సాధు పృష్టం మహాదేవి అకథ్యం కథయామి తే |

న ప్రకాశ్యం వరారోహే స్వయోనిరివ సుందరి || ౨ ||

 

ప్రాణాధికప్రియతరా భవతీ మమ మోహినీ |

క్షణమాత్రం న జీవామి త్వాం వినా పరమేశ్వరి || ౩ ||

 

యథాదర్శేఽమలే బింబం ఘృతం దధ్యాదిసంయుతమ్ |

తథాహం జగతామాద్యే త్వయి సర్వత్ర గోచరః || ౪ ||

 

శృణు దేవి ప్రవక్ష్యామి జపాత్ సార్వజ్ఞదాయకమ్ |

సదాశివ ఋషిః ప్రోక్తోఽనుష్టుప్ ఛందశ్చ ఈరితః || ౫ ||

 

దేవతా భైరవో దేవి పురుషార్థచతుష్టయే |

వినియోగః ప్రయోక్తవ్యః సర్వకర్మఫలప్రదః || ౬ ||

 

అథ స్తోత్రమ్ |

మహాకాళీ జగద్ధాత్రీ జగన్మాతా జగన్మయీ |

జగదంబా జగత్సారా జగదానందకారిణీ || ౭ ||

 

జగద్విధ్వంసినీ గౌరీ దుఃఖదారిద్ర్యనాశినీ |

భైరవభావినీ భావానంతా సారస్వతప్రదా || ౮ ||

 

చతుర్వర్గప్రదా సాధ్వీ సర్వమంగళమంగళా |

భద్రకాళీ విశాలాక్షీ కామదాత్రీ కళాత్మికా || ౯ ||

 

నీలవాణీ మహాగౌరసర్వాంగా సుందరీ పరా |

సర్వసంపత్ప్రదా భీమనాదినీ వరవర్ణినీ || ౧౦ ||

 

వరారోహా శివారోహా మహిషాసురఘాతినీ |

శివపూజ్యా శివప్రీతా దానవేంద్రప్రపూజితా || ౧౧ ||

 

సర్వవిద్యామయీ శర్వసర్వాభీష్టఫలప్రదా |

కోమలాంగీ విధాత్రీ చ విధాతృవరదాయినీ || ౧౨ ||

 

పూర్ణేందువదనా నీలమేఘవర్ణా కపాలినీ |

కురుకుల్లా విప్రచిత్తా కాంతచిత్తా మదోన్మదా || ౧౩ ||

 

మత్తాంగీ మదనప్రీతా మదాఘూర్ణితలోచనా |

మదోత్తీర్ణా ఖర్పరాఽసినరముండవిలాసినీ || ౧౪ ||

 

నరముండస్రజా దేవీ ఖడ్గహస్తా భయానకా |

అట్టహాసయుతా పద్మా పద్మరాగోపశోభితా || ౧౫ ||

 

వరాఽభయప్రదా కాళీ కాలరాత్రిస్వరూపిణీ |

స్వధా స్వాహా వషట్కారా శరదిందుసమప్రభా || ౧౬ ||

 

శరత్జ్యోత్స్నా చ సంహ్లాదా విపరీతరతాతురా |

ముక్తకేశీ ఛిన్నజటా జటాజూటవిలాసినీ || ౧౭ ||

 

సర్పరాజయుతా భీమా సర్పరాజోపరిస్థితా |

శ్మశానస్థా మహానందిస్తుతా సందీప్తలోచనా || ౧౮ ||

 

శవాసనరతా నందా సిద్ధచారణసేవితా |

బలిదానప్రియా గర్భా భూర్భువఃస్వఃస్వరూపిణీ || ౧౯ ||

 

గాయత్రీ చైవ సావిత్రీ మహానీలసరస్వతీ |

లక్ష్మీర్లక్షణసంయుక్తా సర్వలక్షణలక్షితా || ౨౦ ||

 

వ్యాఘ్రచర్మావృతా మేధ్యా త్రివలీవలయాంచితా |

గంధర్వైః సంస్తుతా సా హి తథా చేందా మహాపరా || ౨౧ ||

 

పవిత్రా పరమా మాయా మహామాయా మహోదయా |

ఇతి తే కథితం దివ్యం శతం నామ్నాం మహేశ్వరి || ౨౨ ||

 

యః పఠేత్ ప్రాతరుత్థాయ స తు విద్యానిధిర్భవేత్ |

ఇహ లోకే సుఖం భుక్త్వా దేవీసాయుజ్యమాప్నుయాత్ || ౨౩ ||

 

తస్య వశ్యా భవంత్యేతే సిద్ధౌఘాః సచరాచరాః |

ఖేచరా భూచరాశ్చైవ తథా స్వర్గచరాశ్చ యే || ౨౪ ||

 

తే సర్వే వశమాయాంతి సాధకస్య హి నాన్యథా |

నామ్నాం వరం మహేశాని పరిత్యజ్య సహస్రకమ్ || ౨౫ ||

 

పఠితవ్యం శతం దేవి చతుర్వర్గఫలప్రదమ్ |

అజ్ఞాత్వా పరమేశాని నామ్నాం శతం మహేశ్వరి || ౨౬ ||

 

భజతే యో మహకాళీం సిద్ధిర్నాస్తి కలౌ యుగే |

ప్రపఠేత్ ప్రయతో భక్త్యా తస్య పుణ్యఫలం శృణు || ౨౭ ||

 

లక్షవర్షసహస్రస్య కాళీపూజాఫలం భవేత్ |

బహునా కిమిహోక్తేన వాంఛితార్థీ భవిష్యతి || ౨౮ ||

 

ఇతి శ్రీబృహన్నీలతంత్రే త్రయోవింశః పటలే భైరవపార్వతీసంవాదే శ్రీ మహాకాళీ శతనామ స్తోత్రమ్ ||