దధన్నైరంతర్యాదపి మలినచర్యాం సపది యత్

సపర్యాం పశ్యన్ సన్ విశతు సురపుర్యాం నరపశుః |

భటాన్వర్యాన్ వీర్యాసమహరదసూర్యాన్ సమితి యా

జగద్ధుర్యా కాళీ మమ మనసి కుర్యాన్నివసతిమ్ || ౧ ||

 

లసన్నాసాముక్తా నిజచరణభక్తావనవిధౌ

సముద్యుక్తా రక్తాంబురుహదృగలక్తాధరపుటా |

అపి వ్యక్తాఽవ్యక్తాయమనియమసక్తాశయశయా

జగద్ధుర్యా కాళీ మమ మనసి కుర్యాన్నివసతిమ్ || ౨ ||

 

రణత్సన్మంజీరా ఖలదమనధీరాఽతిరుచిర-

-స్ఫురద్విద్యుచ్చీరా సుజనఝషనీరాయితతనుః |

విరాజత్కోటీరా విమలతరహీరా భరణభృత్

జగద్ధుర్యా కాళీ మమ మనసి కుర్యాన్నివసతిమ్ || ౩ ||

 

వసానా కౌశేయం కమలనయనా చంద్రవదనా

దధానా కారుణ్యం విపులజఘనా కుందరదనా |

పునానా పాపాద్యా సపది విధునానా భవభయం

జగద్ధుర్యా కాళీ మమ మనసి కుర్యాన్నివసతిమ్ || ౪ ||

 

రధూత్తంసప్రేక్షారణరణికయా మేరుశిఖరాత్

సమాగాద్యా రాగాజ్ఝటితి యమునాగాధిపమసౌ |

నగాదీశప్రేష్ఠా నగపతిసుతా నిర్జరనుతా

జగద్ధుర్యా కాళీ మమ మనసి కుర్యాన్నివసతిమ్ || ౫ ||

 

విలసన్నవరత్నమాలికా

కుటిలశ్యామలకుంతలాలికా |

నవకుంకుమభవ్యభాలికా-

-ఽవతు సా మాం సుఖకృద్ధి కాళికా || ౬ ||

 

యమునాచలద్దమునా దుఃఖదవస్య దేహినామ్ |

అమునా యది వీక్షితా సకృచ్ఛము నానావిధమాతనోత్యహో || ౭ ||

 

అనుభూతి సతీప్రాణపరిత్రాణపరాయణా |

దేవైః కృతసపర్యా సా కాళీ కుర్యాచ్ఛుభాని నః || ౮ ||

 

య ఇదం కాళికాస్తోత్రం పఠేత్తు ప్రయతః శుచిః |

దేవీసాయుజ్యభుక్ చేహ సర్వాన్ కామానవాప్నుయాత్ || ౯ ||

 

ఇతి శ్రీ కాళికా స్తోత్రమ్ |