కాళీ కాళి మహాకాళి కాళికే పాపహారిణి |

ధర్మమోక్షప్రదే దేవి గుహ్యకాళి నమోఽస్తు తే || ౧ ||

 

సంగ్రామే విజయం దేహి ధనం దేహి సదా గృహే |

ధర్మకామార్థసంపత్తిం దేహి కాళి నమోఽస్తు తే || ౨ ||

 

ఉల్కాముఖి లలజ్జిహ్వే ఘోరరావే భగప్రియే |

శ్మశానవాసిని ప్రేతే శవమాంసప్రియేఽనఘే || ౩ ||

 

అరణ్య చారిణి శివే కులద్రవ్యమయీశ్వరి |

ప్రసన్నాభవ దేవేశి భక్తస్య మమ కాళికే || ౪ ||

 

శుభాని సంతు కౌలానాం నశ్యంతు ద్వేషకారకాః |

నిందాకరా క్షయం పాంతు యే చ హాస్య ప్రకుర్వతే || ౫ ||

 

యే ద్విషంతి జుగుప్సంతే యే నిందంతి హసంతి యే |

యేఽసూయంతే చ శంకంతే మిథ్యేతి ప్రవదంతి యే || ౬ ||

 

తే డాకినీముఖే యాంతు సదారసుతబాంధవాః |

పిబత్వం శోణితం తస్య చాముండా మాంసమత్తు చ || ౭ ||

 

ఆస్థీనిచర్వయంత్వస్య యోగినీ భైరవీగణాః |

యానిందాగమతంత్రాదౌ యా శక్తిషు కులేషు యా || ౮ ||

 

కులమార్గేషు యా నిందా సా నిందా తవ కాళికే |

త్వన్నిందాకారిణాం శాస్త్రీ త్వమేవ పరమేశ్వరి || ౯ ||

 

న వేదం న తపో దానం నోపవాసాదికం వ్రతమ్ |

చాంద్రాయణాది కృచ్ఛం చ న కించిన్మానయామ్యహమ్ || ౧౦ ||

 

కింతు త్వచ్చరణాంభోజ సేవాం జానే శివాజ్ఞయా |

త్వదర్చా కుర్వతో దేవి నిందాపి సఫలా మమ || ౧౧ ||

 

రాజ్యం తస్య ప్రతిష్ఠా చ లక్ష్మీస్తస్య సదా స్థిరా |

తస్య ప్రభుత్వం సామర్థ్యం యస్య త్వం మస్తకోపరి || ౧౨ ||

 

ధన్యోఽహం కృతకృత్యోఽహం సఫలం జీవతం మమ |

యస్య త్వచ్చరణద్వందే మనో నివిశతే సదా || ౧౩ ||

 

దైత్యాః వినాశమాయాంతు క్షయం యాంతు చ దానవాః |

నశ్యంతు ప్రేతకూష్మాండా రాక్షసా అసురాస్తథా || ౧౪ ||

 

పిశాచ భూత వేతాళాం క్షేత్రపాలా వినాయకాః |

గుహ్యకాః ఘోణకాశ్చైవ విలీయంతా సహస్రధా || ౧౫ ||

 

భారుండా జంభకాః స్కాందాః ప్రమథాః పితరస్తథా |

యోగిన్యో మాతరశ్చాపి డాకిన్యః పూతనాస్తథా || ౧౬ ||

 

భస్మీభవంతు సపది త్వత్ ప్రసాదాత్ సురేశ్వరి |

దివాచరా రాత్రిచరా యే చ సంధ్యాచరా అపి || ౧౭ ||

 

శాఖాచరా వనచరాః కందరాశైలచారిణః |

ద్వేష్టారో యే జలచరా గుహాబిలచరా అపి || ౧౮ ||

 

స్మరణాదేవ తే సర్వే ఖండఖండా భవంతు తే |

సర్పా నాగా యాతుధానా దస్యుమాయావినస్తథా || ౧౯ ||

 

హింసకా విద్విషో నిందాకరా యే కులదూషకాః |

మారణోచ్చాటనోన్మూల ద్వేష మోహనకారకాః || ౨౦ ||

 

కృత్యాభిచారకర్తారః కౌలవిశ్వాసఘాతకాః |

త్వత్ప్రసాదాజ్జగద్ధాత్రి నిధనం యాంతు తేఽఖిలాః || ౨౧ ||

 

నవగ్రహాః సతిథయో నక్షత్రాణి చ రాశయః |

సంక్రాంతయోఽబ్దా మాసాశ్చ ఋతవో ద్వే తథాయనే || ౨౨ ||

 

కలాకాష్ఠాముహుర్తాశ్చ పక్షాహోరాత్రయస్తథా |

మన్వంతరాణి కల్పాశ్చ యుగాని యుగసంధయః || ౨౩ ||

 

దేవలోకాః లోకపాలాః పితరో వహ్నయస్తథా |

అధ్వరా నిధయో వేదాః పురాణాగమసంహితా || ౨౪ ||

 

ఏతే మయా కీర్తితా యే యే చాన్యే నానుకీర్తితాః |

ఆజ్ఞయా గుహ్యకాళ్యాస్తే మమ కుర్వంతు మంగళమ్ || ౨౫ ||

 

భవంతు సర్వదా సౌమ్యాః సర్వకాలం సుఖావహాః |

ఆరోగ్యం సర్వదా మేఽస్తు యుద్ధే చైవాపరాజయః || ౨౬ ||

 

దుఃఖహానిః సదైవాస్తాం విఘ్ననాశః పదే పదే |

అకాలమృత్యు దారిద్ర్యం బంధనం నృపతేర్భయమ్ || ౨౭ ||

 

గుహ్యకాళ్యాః ప్రసాదేన న కదాపి భవేన్మమ |

సంత్వింద్రియాణి సుస్థాని శాంతిః కుశలమస్తు మే || ౨౮ ||

 

వాంఛాప్తిర్మనసః సౌఖ్యం కల్యాణం సుప్రజాస్తథా |

బలం విత్తం యశః కాంతిర్వృద్ధిర్విద్యా మహోదయః || ౨౯ ||

 

దీర్ఘాయురప్రధృష్యత్వం వీర్యం సామర్థ్యమేవ చ |

వినాశో ద్వేషకర్తౄణాం కౌలికానాం మహోన్నతిః |

జాయతాం శాంతిపాఠేన కులవర్త్మ ధృతాత్మనామ్ || ౩౦ ||

 

ఇతి శ్రీ కాళీ శాంతి స్తోత్రమ్ |