శ్రీపార్వత్యువాచ |

దేవదేవ మహాదేవ శంకర ప్రాణవల్లభ |

కవచం శ్రోతుమిచ్ఛామి బాలాయా వద మే ప్రభో || ౧ ||

 

శ్రీమహేశ్వర ఉవాచ |

శ్రీబాలాకవచం దేవి మహాప్రాణాధికం పరమ్ |

వక్ష్యామి సావధానా త్వం శృణుష్వావహితా ప్రియే || ౨ ||

 

అథ ధ్యానమ్ |

అరుణకిరణజాలైః రంజితాశావకాశా

విధృతజపవటీకా పుస్తకాభీతిహస్తా |

ఇతరకరవరాఢ్యా ఫుల్లకహ్లారసంస్థా

నివసతు హృది బాలా నిత్యకల్యాణశీలా ||

 

అథ కవచమ్ |

వాగ్భవః పాతు శిరసి కామరాజస్తథా హృది |

శక్తిబీజం సదా పాతు నాభౌ గుహ్యే చ పాదయోః || ౧ ||

 

ఐం క్లీం సౌః వదనే పాతు బాలా మాం సర్వసిద్ధయే |

హసకలహ్రీం సౌః పాతు స్కంధే భైరవీ కంఠదేశతః || ౨ ||

 

సుందరీ నాభిదేశేఽవ్యాచ్చర్చే కామకలా సదా |

భ్రూనాసయోరంతరాలే మహాత్రిపురసుందరీ || ౩ ||

 

లలాటే సుభగా పాతు భగా మాం కంఠదేశతః |

భగోదయా తు హృదయే ఉదరే భగసర్పిణీ || ౪ ||

 

భగమాలా నాభిదేశే లింగే పాతు మనోభవా |

గుహ్యే పాతు మహావీరా రాజరాజేశ్వరీ శివా || ౫ ||

 

చైతన్యరూపిణీ పాతు పాదయోర్జగదంబికా |

నారాయణీ సర్వగాత్రే సర్వకార్య శుభంకరీ || ౬ ||

 

బ్రహ్మాణీ పాతు మాం పూర్వే దక్షిణే వైష్ణవీ తథా |

పశ్చిమే పాతు వారాహీ హ్యుత్తరే తు మహేశ్వరీ || ౭ ||

 

ఆగ్నేయ్యాం పాతు కౌమారీ మహాలక్ష్మీశ్చ నిరృతౌ |

వాయవ్యాం పాతు చాముండా చేంద్రాణీ పాతు చైశకే || ౮ ||

 

జలే పాతు మహామాయా పృథివ్యాం సర్వమంగళా |

ఆకాశే పాతు వరదా సర్వతో భువనేశ్వరీ || ౯ ||

 

ఇదం తు కవచం నామ దేవానామపి దుర్లభమ్ |

పఠేత్ప్రాతః సముత్థాయ శుచిః ప్రయతమానసః || ౧౦ ||

 

నామయో వ్యాధయస్తస్య న భయం చ క్వచిద్భవేత్ |

న చ మారీభయం తస్య పాతకానాం భయం తథా || ౧౧ ||

 

న దారిద్ర్యవశం గచ్ఛేత్తిష్ఠేన్మృత్యువశే న చ |

గచ్ఛేచ్ఛివపురం దేవి సత్యం సత్యం వదామ్యహమ్ || ౧౨ ||

 

యదిదం కవచం జ్ఞాత్వా శ్రీబాలాం యో జపేచ్ఛివే |

స ప్రాప్నోతి ఫలం సర్వం శివసాయుజ్యసంభవమ్ || ౧౩ ||

 

ఇతి శ్రీరుద్రయామలే శ్రీ బాలా కవచమ్ |