అస్య శ్రీబాలాస్తవరాజస్తోత్రస్య శ్రీమృత్యుంజయ ఋషిః, కకుప్ఛందః, శ్రీబాలా దేవతా, క్లీం బీజం, సౌః శక్తిః, ఐం కీలకం, భోగమోక్షార్థే జపే వినియోగః |

 

కరన్యాసః –

ఐం అంగుష్ఠాభ్యాం నమః |

క్లీం తర్జనీభ్యాం నమః |

సౌః మధ్యమాభ్యాం నమః |

ఐం అనామికాభ్యాం నమః |

క్లీం కనిష్ఠికాభ్యాం నమః |

సౌః కరతల కరపృష్ఠాభ్యాం నమః |

 

హృదయాదిన్యాసః –

ఐం హృదయాయ నమః |

క్లీం శిరసే స్వాహా |

సౌః శిఖాయై వషట్ |

ఐం కవచాయ హుమ్ |

క్లీం నేత్రత్రయాయ వౌషట్ |

సౌః అస్త్రాయ ఫట్ |

భూర్భువస్సువరోం ఇతి దిగ్బంధః ||

 

ధ్యానమ్ |

అక్షపుస్తధరాం రక్తాం వరాభయకరాంబుజామ్ |

చంద్రముండాం త్రినేత్రాం చ ధ్యాయేద్బాలాం ఫలప్రదామ్ || ౧ ||

 

ఐం త్రైలోక్యవిజయాయై హుం ఫట్ |

క్లీం త్రిగుణరహితాయై హుం ఫట్ |

సౌః సర్వైశ్వర్యదాయిన్యై హుం ఫట్ || ౨ ||

 

నాతః పరతరా సిద్ధిర్నాతః పరతరా గతిః |

నాతః పరతరో మంత్రః సత్యం సత్యం వదామ్యహమ్ || ౩ ||

 

రక్తాం రక్తచ్ఛదాం తీక్ష్ణాం రక్తపాం రక్తవాససీమ్ |

స్వరూపాం రత్నభూషాం చ లలజ్జిహ్వాం పరాం భజే || ౪ ||

 

త్రైలోక్యజననీం సిద్ధాం త్రికోణస్థాం త్రిలోచనామ్ |

త్రివర్గఫలదాం శాంతాం వందే బీజత్రయాత్మికామ్ || ౫ ||

 

శ్రీబాలాం వారుణీప్రీతాం బాలార్కకోటిద్యోతినీమ్ |

వరదాం బుద్ధిదాం శ్రేష్ఠాం వామాచారప్రియాం భజే || ౫ ||

 

చతుర్భుజాం చారునేత్రాం చంద్రమౌలిం కపాలినీమ్ |

చతుఃషష్టియోగినీశాం వీరవంద్యాం భజామ్యహమ్ || ౬ ||

 

కౌలికాం కలతత్త్వస్థాం కౌలావారాంకవాహనామ్ |

కౌసుంభవర్ణాం కౌమారీం కవర్మధారిణీం భజే || ౭ ||

 

ద్వాదశస్వరరూపాయై నమస్తేఽస్తు నమో నమః |

నమో నమస్తే బాలాయై కారుణ్యాయై నమో నమః || ౮ ||

 

విద్యావిద్యాద్యవిద్యాయై నమస్తేఽస్తు నమో నమః |

విద్యారాజ్ఞ్యై మహాదేవ్యై శివాయై సతతం నమః || ౯ ||

 

ఐం బాలాయై విద్మహే క్లీం త్రిభువనేశ్వర్యై ధీమహి |

సౌః తన్నో దేవీ ప్రచోదయాత్ | ఐం బాలాయై స్వాహా || ౧౦ ||

 

ద్వాదశాంతాలయాం శ్రేష్ఠాం షోడశాధారగాం శివామ్ |

పంచేంద్రియస్వరూపాఖ్యాం భూయో భూయో నమామ్యహమ్ || ౧౧ ||

 

బ్రహ్మవిద్యాం బ్రహ్మరూపాం బ్రహ్మజ్ఞానప్రదాయినీమ్ |

వసుప్రదాం వేదరూపాం వందే బాలాం శుభాననామ్ || ౧౨ ||

 

అఘోరాం భీషణామాద్యామనంతోపరిసంస్థితామ్ |

దేవదేవేశ్వరీం భద్రాం శ్రీబాలాం ప్రణమామ్యహమ్ || ౧౩ ||

 

భవప్రియాం భవాధారాం భగరూపాం భగప్రియామ్ |

భయానకాం భూతధాత్రీం భూదేవపూజితాం భజే || ౧౪ ||

 

అకారాదిక్షకారాంతాం క్లీబాక్షరాత్మికాం పరామ్ |

వందే వందే మహామాయాం భవభవ్యభయాపహామ్ || ౧౫ ||

 

నాడీరూప్యై నమస్తేఽస్తు ధాతురూప్యై నమో నమః |

జీవరూప్యై నమస్యామి బ్రహ్మరూప్యై నమో నమః || ౧౬ ||

 

నమస్తే మంత్రరూపాయై పీఠగాయై నమో నమః |

సింహాసనేశ్వరి తుభ్యం సిద్ధిరూప్యై నమో నమః || ౧౭ ||

 

నమస్తే మాతృరూపిణ్యై నమస్తే భైరవప్రియే |

నమస్తే చోపపీఠాయై బాలాయై సతతం నమః || ౧౮ ||

 

యోగేశ్వర్యై నమస్తేఽస్తు యోగదాయై నమో నమః |

యోగనిద్రాస్వరూపిణ్యై బాలాదేవ్యై నమో నమః || ౧౯ ||

 

సుపుణ్యాయై నమస్తేఽస్తు సుశుద్ధాయై నమో నమః |

సుగుహ్యాయై నమస్తేఽస్తు బాలాదేవ్యై నమో నమః || ౨౦ ||

 

ఇతీదం స్తవరాజాఖ్యం సర్వస్తోత్రోత్తమోత్తమమ్ |

యే పఠంతి మహేశాని పునర్జన్మ న విద్యతే || ౨౧ ||

 

సర్వపాపహరం పుణ్యం సర్వస్ఫోటవినాశకమ్ |

సర్వసిద్ధిప్రదం శ్రేష్ఠం భోగైశ్వర్యప్రదాయకమ్ || ౨౨ ||

 

భూర్భువస్సువరోం ఇతి దిగ్విమోకః ||

 

ఇతి శ్రీ బాలా స్తవరాజః |