విద్యాక్షమాలాసుకపాలముద్రా-

-రాజత్కరాం కుందసమానకాంతిమ్ |

ముక్తాఫలాలంకృతశోభనాంగీం

బాలాం భజే వాఙ్మయసిద్ధిహేతోః || ౧ ||

 

భజే కల్పవృక్షాధ ఉద్దీప్తరత్నా-

-ఽఽసనే సన్నిషణ్ణాం మదాఘూర్ణితాక్షీమ్ |

కరైర్బీజపూరం కపాలేషుచాపం

సపాశాంకుశాం రక్తవర్ణాం దధానామ్ || ౨ ||

 

వ్యాఖ్యానముద్రామృతకుంభవిద్యాం

అక్షస్రజం సందధతీం కరాబ్జైః |

చిద్రూపిణీం శారదచంద్రకాంతిం

బాలాం భజే మౌక్తికభూషితాంగీమ్ || ౩ ||

 

పాశాంకుశౌ పుస్తకమక్షసూత్రం

కరైర్దధానాం సకలామరార్చ్యామ్ |

రక్తాం త్రిణేత్రాం శశిశేఖరాం తాం

భజేఽఖిలర్ఘ్యై త్రిపురాం చ బాలామ్ || ౪ ||

 

ఆరక్తాం శశిఖండమండితజటాజూటానుబద్ధస్రజం

బంధూకప్రసవారుణాంబరధరాం రక్తాంబుజాధ్యాసినీమ్ |

త్వాం ధ్యాయామి చతుర్భుజాం త్రిణయనామాపీనరమ్యస్తనీం

మధ్యే నిమ్నవలిత్రయాంకితతనుం త్వద్రూపసంపత్తయే || ౫ ||

 

ఆధారే తరుణార్కబింబరుచిరం సోమప్రభం వాగ్భవం

బీజం మన్మథమింద్రగోపకనిభం హృత్పంకజే సంస్థితమ్ |

రంధ్రే బ్రహ్మపదే చ శాక్తమపరం చంద్రప్రభాభాసురం

యే ధ్యాయంతి పదత్రయం తవ శివే తే యాంతి సూక్ష్మం పదమ్ || ౬ ||

 

రక్తాంబరాం చంద్రకలావతంసాం

సముద్యదాదిత్యనిభాం త్రిణేత్రామ్ |

విద్యాక్షమాలాభయదానహస్తాం

ధ్యాయామి బాలామరుణాంబుజస్థామ్ || ౭ ||

 

అకలంకశశాంకాభా త్ర్యక్షా చంద్రకలావతీ |

ముద్రాపుస్తలసద్బాహా పాతు మాం పరమా కలా || ౮ ||

 

మాతులింగపయోజన్మహస్తాం కనకసన్నిభామ్ |

పద్మాసనగతాం బాలాం ధ్యాయామి ధనసిద్ధయే || ౯ ||

 

వరపీయూషకలశపుస్తకాభీతిధారిణీమ్ |

సుధాం స్రవంతీం జ్ఞానాప్త్యై బ్రహ్మరంధ్రే విచింతయే || ౧౦ ||

 

శుక్లాంబరాం శశాంకాభాం ధ్యాయామ్యారోగ్యదాయినీమ్ |

సృణిపాశధరాం దేవీం రత్నాలంకారభూషితామ్ || ౧౧ ||

 

అకారాదిక్షకారాంతవర్ణావయవశాలినీమ్ |

ప్రసన్నామరుణామీక్షే సౌమనస్యప్రదాం శివామ్ || ౧౨ ||

 

పుస్తకజపవటహస్తే వరదాభయచిహ్నబాహులతే |

కర్పూరామలదేహే వాగీశ్వరి చోదయాశు మమ చేతః || ౧౩ ||

 

ఇతి శ్రీ బాలా వాంఛాదాత్రీ స్తోత్రమ్ |