బ్రాహ్మీరూపధరే దేవి బ్రహ్మాత్మా బ్రహ్మపాలికా |
విద్యామంత్రాదికం సర్వం సిద్ధిం దేహి పరేశ్వరి || ౧ ||
మహేశ్వరీ మహామాయా మానందా మోహహారిణీ |
మంత్రసిద్ధిఫలం దేహి మహామంత్రార్ణవేశ్వరి || ౨ ||
గుహ్యేశ్వరీ గుణాతీతా గుహ్యతత్త్వార్థదాయినీ |
గుణత్రయాత్మికా దేవీ మంత్రసిద్ధిం దదస్వ మామ్ || ౩ ||
నారాయణీ చ నాకేశీ నృముండమాలినీ పరా |
నానాననా నాకులేశీ మంత్రసిద్ధిం ప్రదేహి మే || ౪ ||
ఘృష్టిచక్రా మహారౌద్రీ ఘనోపమవివర్ణకా |
ఘోరఘోరతరా ఘోరా మంత్రసిద్ధిప్రదా భవ || ౫ ||
శక్రాణీ సర్వదైత్యఘ్నీ సహస్రలోచనీ శుభా |
సర్వారిష్టవినిర్ముక్తా సా దేవీ మంత్రసిద్ధిదా || ౬ ||
చాముండారూపదేవేశీ చలజ్జిహ్వా భయానకా |
చతుష్పీఠేశ్వరీ దేహి మంత్రసిద్ధిం సదా మమ || ౭ ||
లక్ష్మీలావణ్యవర్ణా చ రక్తా రక్తమహాప్రియా |
లంబకేశా రత్నభూషా మంత్రసిద్ధిం సదా దద || ౮ ||
బాలా వీరార్చితా విద్యా విశాలనయనాననా |
విభూతిదా విష్ణుమాతా మంత్రసిద్ధిం ప్రయచ్ఛ మే || ౯ ||
మంత్రసిద్ధిస్తవం పుణ్యం మహామోక్షఫలప్రదమ్ |
మహామోహహరం సాక్షాత్ సత్యం మంత్రస్య సిద్ధిదమ్ || ౧౦ ||
ఇతి మహాకాలసంహితాయాం శ్రీ బాలా మంత్రసిద్ధి స్తవః |
