ఉద్యద్భానుసహస్రకాంతిమరుణక్షౌమాంబరాలంకృతాం

గంధాలిప్తపయోధరాం జపవటీం విద్యామభీతిం వరమ్ |

హస్తాబ్జైర్దధతీం త్రిణేత్రవిలసద్వక్త్రారవిందశ్రియం

దేవీం బద్ధహిమాంశురత్నమకుటాం వందేఽరవిందస్థితామ్ || ౧ ||

 

ఏణధరాశ్మకృతోన్నతధిష్ణ్యం

హేమవినిర్మితపాదమనోజ్ఞమ్ |

శోణశిలాఫలకం చ విశాలం

దేవి సుఖాసనమద్య దదామి || ౨ ||

 

ఈశమనోహరరూపవిలాసే

శీతలచందనకుంకుమమిశ్రమ్ |

హృద్యసువర్ణఘటే పరిపూర్ణం

పాద్యమిదం త్రిపురేశి గృహాణ || ౩ ||

 

లబ్ధభవత్కరుణోఽహమిదానీం

రక్తసుమాక్షతయుక్తమనర్ఘమ్ |

రుక్మవినిర్మితపాత్రవిశేషే-

-ష్వర్ఘ్యమిదం త్రిపురేశి గృహాణ || ౪ ||

 

హ్రీమితి మంత్రజపేన సుగమ్యే

హేమలతోజ్జ్వలదివ్యశరీరే |

యోగిమనః సమశీతజలేన

హ్యాచమనం త్రిపురేఽద్య విధేహి || ౫ ||

 

హస్తలసత్కటకాది సుభూషాః

ఆదరతోఽంబ వరోప్య నిధాయ |

చందనవాసితమంత్రితతోయైః

స్నానమయి త్రిపురేశి విధేహి || ౬ ||

 

సంచితమంబ మయా హ్యతిమూల్యం

కుంకుమశోణమతీవ మృదు త్వమ్ |

శంకరతుంగతరాంకనివాసే

వస్త్రయుగం త్రిపురే పరిధేహి || ౭ ||

 

కందలదంశుకిరీటమనర్ఘం

కంకణకుండలనూపురహారమ్ |

అంగదమంగులిభూషణమంబ

స్వీకురు దేవి పురాధినివాసే || ౮ ||

 

హస్తలసద్వరభీతిహముద్రే

శస్తతరం మృగనాభిసమేతమ్ |

సద్ఘనసారసుకుంకుమమిశ్రం

చందనపంకమిదం చ గృహాణ || ౯ ||

 

లబ్ధవికాసకదంబకజాతీ-

-చంపకపంకజకేతకయుక్తైః |

పుష్యచయైర్మనసాముచితైస్త్వాం

అంబ పురేశి భవాని భజామి || ౧౦ ||

 

హ్రీం‍పదశోభిమహామనురూపే

ధూరసి మంత్రవరేణ మనోజ్ఞమ్ |

అష్టసుగంధరజఃకృతమాద్యే

ధూపమిమం త్రిపురేశి దదామి || ౧౧ ||

 

సంతమసాపహముజ్జ్వలపాత్రే

గవ్యఘృతైః పరివర్ధితదేహమ్ |

చంపకకుడ్మలవృంతసమానం

దీపగణం త్రిపురేఽద్య గృహాణ || ౧౨ ||

 

కల్పితమద్య ధియాఽమృతకల్పం

దుగ్ధసితాయుతమన్నవిశేషమ్ |

మాషవినిర్మితపూపసహస్రం

స్వీకురు దేవి నివేదనమాద్యే || ౧౩ ||

 

లంఘితకేతకవర్ణవిశేషైః

శోధితకోమలనాగదలైశ్చ |

మౌక్తికచూర్ణయుతైః క్రముకాద్యైః

పూర్ణతరాంబ పురస్తవ పాత్రీ || ౧౪ ||

 

హ్రీం‍త్రయపూరితమంత్రవిశేషం

పంచదశీమపి షోడశరూపమ్ |

సంచితపాపహరం చ జపిత్వా

మంత్రసుమాంజలిమంబ దదామి || ౧౫ ||

 

శ్రీం‍పదపూర్ణమహామనురూపే

శ్రీశివకామమహేశ్వరహృద్యే |

శ్రీగుహవందితపాదపయోజే

బాలవపుర్ధరదేవి నమస్తే || ౧౬ ||

 

ఇతి శ్రీ బాలా మానస పూజా స్తోత్రమ్ |