శ్రీకాళీ బగళాముఖీ చ లలితా ధూమావతీ భైరవీ

మాతంగీ భువనేశ్వరీ చ కమలా శ్రీర్వజ్రవైరోచనీ |

తారా పూర్వమహాపదేన కథితా విద్యా స్వయం శంభునా

లీలారూపమయీ చ దేశదశధా బాలా తు మాం పాతు సా || ౧ ||

 

శ్యామాం శ్యామఘనావభాసరుచిరాం నీలాలకాలంకృతాం

బింబోష్ఠీం బలిశత్రువందితపదాం బాలార్కకోటిప్రభామ్ |

త్రాసత్రాసకృపాణముండదధతీం భక్తాయ దానోద్యతాం

వందే సంకటనాశినీం భగవతీం బాలాం స్వయం కాళికామ్ || ౨ ||

 

బ్రహ్మాస్త్రాం సుముఖీం బకారవిభవాం బాలాం బలాకీనిభాం

హస్తన్యస్తసమస్తవైరిరసనామన్యే దధానాం గదామ్ |

పీతాం భూషణగంధమాల్యరుచిరాం పీతాంబరాంగాం వరాం

వందే సంకటనాశినీం భగవతీం బాలాం బగళాముఖీమ్ || ౩ ||

 

బాలార్కద్యుతిభస్కరాం త్రినయనాం మందస్మితాం సన్ముఖీం

వామే పాశధనుర్ధరాం సువిభవాం బాణం తథా దక్షిణే |

పారావారవిహారిణీం పరమయీం పద్మాసనే సంస్థితాం

వందే సంకటనాశినీం భగవతీం బాలాం స్వయం షోడశీమ్ || ౪ ||

 

దీర్ఘాం దీర్ఘకుచాముదగ్రదశనాం దుష్టచ్ఛిదాం దేవతాం

క్రవ్యాదాం కుటిలేక్షణాం చ కుటిలాం కాకధ్వజాం క్షుత్కృశామ్ |

దేవీం శూర్పకరాం మలీనవసనాం తాం పిప్పలాదార్చితామ్ |

బాలాం సంకటనాశినీం భగవతీం ధ్యాయామి ధూమావతీమ్ || ౫ ||

 

ఉద్యత్కోటిదివాకరప్రతిభటాం బాలార్కభాకర్పటాం

మాలాపుస్తకపాశమంకుశవరాన్ దైత్యేంద్రముండస్రజామ్ |

పీనోత్తుంగపయోధరాం త్రినయనాం బ్రహ్మాదిభిః సంస్తుతాం

బాలాం సంకటనాశినీం భగవతీం శ్రీభైరవీం ధీమహి || ౬ ||

 

వీణావాదనతత్పరాం త్రినయనాం మందస్మితాం సన్ముఖీం

వామే పాశధనుర్ధరాం తు నికరే బాణం తథా దక్షిణే |

పారావారవిహారిణీం పరమయీం బ్రహ్మాసనే సంస్థితాం

వందే సంకటనాశినీం భగవతీం మాతంగినీం బాలికామ్ || ౭ ||

 

ఉద్యత్సూర్యనిభాం చ ఇందుముకుటామిందీవరే సంస్థితాం

హస్తే చారువరాభయం చ దధతీం పాశం తథా చాంకుశమ్ |

చిత్రాలంకృతమస్తకాం త్రినయనాం బ్రహ్మాదిభిః సేవితాం

వందే సంకటనాశినీం చ భువనేశీమాదిబాలాం భజే || ౮ ||

 

దేవీం కాంచనసన్నిభాం త్రినయనాం ఫుల్లారవిందస్థితాం

బిభ్రాణాం వరమబ్జయుగ్మమభయం హస్తైః కిరీటోజ్జ్వలామ్ |

ప్రాలేయాచలసన్నిభైశ్చ కరిభిరాసించ్యమానాం సదా

బాలాం సంకటనాశినీం భగవతీం లక్ష్మీం భజే చేందిరామ్ || ౯ ||

 

సంఛిన్నం స్వశిరో వికీర్ణకుటిలం వామే కరే బిభ్రతీం

తృప్తాస్యాం స్వశరీరజైశ్చ రుధిరైః సంతర్పయంతీం సఖీమ్ |

సద్భక్తాయ వరప్రదాననిరతాం ప్రేతాసనాధ్యాసినీం

బాలాం సంకటనాశినీం భగవతీం శ్రీఛిన్నమస్తాం భజే || ౧౦ ||

 

ఉగ్రామేకజటామనంతసుఖదాం దూర్వాదలాభామజాం

కర్త్రీఖడ్గకపాలనీలకమలాన్ హస్తైర్వహంతీం శివామ్ |

కంఠే ముండస్రజాం కరాళవదనాం కంజాసనే సంస్థితాం

వందే సంకటనాశినీం భగవతీం బాలాం స్వయం తారిణీమ్ || ౧౧ ||

 

ముఖే శ్రీ మాతంగీ తదను కిల తారా చ నయనే

తదంతంగా కాళీ భృకుటిసదనే భైరవి పరా |

కటౌ ఛిన్నా ధూమావతీ జయ కుచే శ్రీకమలజా

పదాంశే బ్రహ్మాస్త్రా జయతి కిల బాలా దశమయీ || ౧౨ ||

 

విరాజన్మందారద్రుమకుసుమహారస్తనతటీ

పరిత్రాసత్రాణ స్ఫటికగుటికా పుస్తకవరా |

గళే రేఖాస్తిస్రో గమకగతిగీతైకనిపుణా

సదా పీతా హాలా జయతి కిల బాలా దశమయీ || ౧౩ ||

 

ఇతి శ్రీమేరుతంత్రే శ్రీ దశవిద్యామయీ బాలా స్తోత్రమ్ |