నిశుంభశుంభమర్దినీం ప్రచండముండఖండనీమ్ |
వనే రణే ప్రకాశినీం భజామి వింధ్యవాసినీమ్ || ౧ ||

త్రిశూలముండధారిణీం ధరావిఘాతహారిణీమ్ |
గృహే గృహే నివాసినీం భజామి వింధ్యవాసినీమ్ || ౨ ||

దరిద్రదుఃఖహారిణీం సతాం విభూతికారిణీమ్ |
వియోగశోకహారిణీం భజామి వింధ్యవాసినీమ్ || ౩ ||

లసత్సులోలలోచనాం జనే సదా వరప్రదామ్ |
కపాలశూలధారిణీం భజామి వింధ్యవాసినీమ్ || ౪ ||

కరే ముదా గదాధరీం శివా శివప్రదాయినీమ్ |
వరాం వరాననాం శుభాం భజామి వింధ్యవాసినీమ్ || ౫ ||

ఋషీంద్రజామినీప్రదాం త్రిధాస్వరూపధారిణీమ్ |
జలే స్థలే నివాసినీం భజామి వింధ్యవాసినీమ్ || ౬ ||

విశిష్టసృష్టికారిణీం విశాలరూపధారిణీమ్ |
మహోదరే విలాసినీం భజామి వింధ్యవాసినీమ్ || ౭ ||

పురందరాదిసేవితాం మురాదివంశఖండనీమ్ |
విశుద్ధబుద్ధికారిణీం భజామి వింధ్యవాసినీమ్ || ౮ ||

ఇతి శ్రీ వింధ్యవాసినీ స్తోత్రమ్ |