శ్వేతపద్మాసనారూఢాం శుద్ధస్ఫటికసన్నిభామ్ |

వందే వాగ్దేవతాం ధ్యాత్వా దేవీం త్రిపురసుందరీమ్ || ౧ ||

 

శైలాధిరాజతనయాం శంకరప్రియవల్లభామ్ |

తరుణేందునిభాం వందే దేవీం త్రిపురసుందరీమ్ || ౨ ||

 

సర్వభూతమనోరమ్యాం సర్వభూతేషు సంస్థితామ్ |

సర్వసంపత్కరీం వందే దేవీం త్రిపురసుందరీమ్ || ౩ ||

 

పద్మాలయాం పద్మహస్తాం పద్మసంభవసేవితామ్ |

పద్మరాగనిభాం వందే దేవీం త్రిపురసుందరీమ్ || ౪ ||

 

పంచబాణధనుర్బాణపాశాంకుశధరాం శుభామ్ |

పంచబ్రహ్మమయీం వందే దేవీం త్రిపురసుందరీమ్ || ౫ ||

 

షట్పుండరీకనిలయాం షడాననసుతామిమామ్ |

షట్కోణాంతఃస్థితాం వందే దేవీం త్రిపురసుందరీమ్ || ౬ ||

 

హరార్ధభాగనిలయామంబామద్రిసుతాం మృడామ్ |

హరిప్రియానుజాం వందే దేవీం త్రిపురసుందరీమ్ || ౭ ||

 

అష్టైశ్వర్యప్రదామంబామష్టదిక్పాలసేవితామ్ |

అష్టమూర్తిమయీం వందే దేవీం త్రిపురసుందరీమ్ || ౮ ||

 

నవమాణిక్యమకుటాం నవనాథసుపూజితామ్ |

నవయౌవనశోభాఢ్యాం వందే త్రిపురసుందరీమ్ || ౯ ||

 

కాంచీవాసమనోరమ్యాం కాంచీదామవిభూషితామ్ |

కాంచీపురీశ్వరీం వందే దేవీం త్రిపురసుందరీమ్ || ౧౦ ||

 

ఇతి శ్రీ త్రిపురసుందరీ స్తోత్రమ్ |